وصيّة // بقلم الشاعر صبري علي

وصية

أوصيك يا ولدي,لمّا تغيب الرّوح..

متحطش شريط إسود ف أيّها حرف م الصّورة.

أقف زنهار..

وقول : "مات,..

....فقير لكن..

عمره ف يوم ما كانت عينه مكسورة"..

وسدّد عنّي أيّها دين, وأيّها شين..

وإوعي تصاحب الخاين, وذو الوشّين.

واوعي يا ولدي تنساني..

كتّر يا ابني دعواتك..

ووصّي كمان بها اخواتك..

وخد بالك من امّك ياض..

بوس على إيدها,وساعدها..

أقف جنبيها وساعدها..

إوعي ف وشّها تكشّر..

وخلّي البسمة تسعدها.

..................

قول : "مات,وكان نفسه يكون شاعر"..

وسايب حتة من قلبه..

ماليها حب ,ومشاعر.

على فكرة..

فايت لك قلمي ع المكتب,مع الدفتر..

فراجع كل كتاباتي..

وإكتب بيه -على لساني- اعتذار رسمي..

لأيّها حد جرّحته بكلمة ف يوم..

يسامحني,ويغفر لىّ....زلّاتي.

...............

عارف يا ابني إن الحمل فوق طاقتك..

ما زلت صغير..

ده احنا لسّة من سنتين مستلمين سوى بطاقتكّ!

فرحت ف يوم ما سمّيتك,وحبّيتك..

,وخبّيتك عن الحاسدين..

وهنّنتك,وجرّأتك..

مكتوب يا ابني تشيل الهم..

خلاص-دلوقت- جه وقتك.

...................

أوصيك يا ولدي بالصّحاب,والأهل.

الصغيّر,والكبير,والكهل.

حاسب على اتنين....الإيمان,والصّبر. 

وايّاك من اتنين....الغرور ,والجهل.

....................

أوصيك يا ولدي بالدخان ,.والكهف.

وسورة الملك,وابراهيم,والصف.

والمعوّذتين,والجن,والإخلاص..

وإوعي تركن مصحفك ع الرّف.

....................

أوصيك يا ولدي بالحلال في المال..

بالحنان,والزّهد,وصالح الأعمال..

وايّاك تصاحب خسيس مهما كان عنده..

وصاحب اللي يصونك ف أصعب الاحوال.

.....................

أوصيك يا ولدي تبقى فاعل خير..

تبقى أسطورة ف العطاء للغير.

تبقى أوّل حد لمّا يتجمّعوا..

وامّا يتفرّقوا.....ياكش تبقي أخير..

واهرب من الباطل حتّي لو عم..

وابحث عن الحق,واشتغل له.........أجير..

.......................

أوصيك كمان يا ولدي بزيارة,وعود أخضر,وصحبة ورد.

واقرا بس ' يس,والمعوّذتين,وأواخر البقرة..

وانا لو فت بالصّدفة على الصالة..

حذار اشوف شريط أسود ف أيّها حرف م الصّورة..

صبري علي

سبتمبر18