خيال سارح لحد الدنيا ما تودي
وحلم حزين مصلوب هنا عندي
وريح عاتية ترجعني
لحيرة تملي تسبقني
علي موجة ما تلحقني
ولا لحتي لعشمي بتهدي
وخطاوي الحلم دبلانة
علي غصون الأمل مالت
عيونها ليل وسهرانة
لا طالت ولا نامت
من البسمة عطشانة
وكاسات صبرها قالت
خيالك حلم متأذي
في فنجانه الخطوط بانت
وياما أحلام ما ظهرت
ولا جوه العقول ماتت
من كتر غيظها إتفجرت
وقالوا عنها كانت
وفي أيامنا إتعصرت
ووقفت تاني ما لانت
مهما شربت الأوهام
تقول خلاص هانت
أقول معقول وأستغرب
وأدور في اللي عدي وفات
ألاقي الحلم بيقرب
مهما بعدت المسافات
ومهما شمسنا تغرب
أو حتي نشيع اللي مات
نصر ربنا قرب
وفي عدله وميزانه آيات
يا حلمي غير العتبات
وأياك في حضن وهم تبات
دا الحاضر ماله علامات
لا تحاول ولا تجرب
ولا ترضي تعيشها سكات
وعن شرقك ما تتغرب
وغير في القصيد أبيات
وأوعي من نصها تهرب
وأضبط وهم الإيقاعات
وخلي الشمس تتشرب
دماء يأسنا فينا
وصحي الصبح بالصرخات
-----------
خلاص هانت
الشاعر محمد ضباشه
ليست هناك تعليقات: