(هاتوا لى ..تورته ) / بقلم الشاعر أحمد التبيني

(هاتوا لى ..تورته ) أحمد التبيني

تلاتين سنه
بيقولوا انى انا عشتهم
لا ماعشتهمش!
يمكن يكون فيهم عامين
مروا عليا كأنهم اقصر يومين
وفرحتهم
لكن حرام لو تحسبوهم عمر فات!
لو تحسبوا المر اللى فيهم والآهات
ح تقولوا عمره ف يوم ماعاش
وهو فيه برواز معلق ع الحيطان
فيه الحياه..
النبض حواليه يجى الف شيء بيحركه
وانا كل شيء حواليا تاه
حتى اللى كانت
بتسلك الشرايين لدمى يجرى
للحب واتنفس هواه
ماتت خلاص..
من بعد امى..ايه قيمة الحياه!
ماتنوروش م الشمع شمعه
انا امى جايه حتقيد الاماكن
ادعوا لى تيجى
احساسى بيقول لى حاتيجى
حاتشيلنى م البرواز وتاخدنى رحله
انا ويا امى حاعيش بجد وعيشتى تحلى
ح القى الحنان والطبطبه
وارجع ف عز البرد ادفى..
ساعتها بس
هاتوا الشموع كامله العدد
وهاتوا لى تورته